लाली गुराँस नफूल्दा चिन्ता

पूर्वी पहाडी जिल्ला तेह्रथुम, ताप्लेजुङ र संखुवासभा जिल्लामा फैलिएर रहेको जलजलेमा यस बर्ष लालीगुराँस कम फूलेपछि स्थानीयवासी चिन्तित बनेका छन् । लाली गुराँसको राजधानी भनेर चिनिने यस क्षेत्रमा वायुमण्डलमा तापक्रम बढेको र समयममै मनसुन नभएकाले कम फूल फूलेको बताइएको छ । चैतको पहिलो सातामै ढकमक्क फुल्ने लालीगुराँस तेश्रो साता भैसक्दा पनि फाट्टफट मात्र फूलेको हो । विश्वमै भएका मध्ये ३६ जातिको लालीगुराँस पाइने यस क्षेत्रमा समयमै पानी नपर्दा गुराँसले ढाकिने डाँडाहरु उजाड रहेको स्थानीय बद्री कोइरालाले बताउनुभयो । मुलुकमै सबैभन्दा बढी लालीगुराँस पाइने भएकाले पनि यो क्षेत्रमा गुराँसको मनोरम दृष्यावलोकन गर्न प्रत्येक वर्ष स्वदेशी तथा विदेशी पर्यटक पुग्ने गर्दथे । पैदल यात्राका लागि पनि यो क्षेत्र राम्रो गन्तव्य मानिन्छ । एकातिर समय बितिसक्दा पनि यस क्षेत्रमा गुराँस फूल्न सकेको छैन भने ताप्लेजुङ, पाँचथर र इलामका केही स्थानमा भने समय अगावै गुराँस फूलेको थियो । यसका कारण पनि जलवायु परिवर्तनको असर परेको बताइन्छ ।